文化资讯 图说香格里拉 工艺美术 宗教信仰 民风民俗 文物古迹 历史文化 人物
མ་ཎི་ཡིག་དྲུག་གི་དོན་དང་ཕན་ཡོན་བཤད་པ།
ཡོངས་བསྒྲགས་ཀྱི་དུས་ཚོད།༇ 2015-01-30 11:52:28   འབྱུང་ཁུངས།༇བཀའ་བདམས་གླེགས་བམ་ལས་བཏུས།

 ཀྱེེ་གངས་རིའི་མགོན་པོ་སྤྱན་རས་གཟིགས།།

        གནས་དེ་ན་ཁྱེད་ཀྱི་ཞིང་ཁམས་ཡོད།།

        ཞིང་དེ་ན་ཁྱེད་ཀྱི་གདུལ་བྱ་ཡོད།།ཅེས་ལུང་བསྟན་པ་བཞིན་གངས་ཅན་བོད་ཁ་བ་ཅན་གྱི་ཡུལ་དུ་འདས་པའི་སངས་རྒྱས་རྣམས་ཀྱིས་ཆོས་འཁོར་མ་བསྐོར་ཀྱང་། སྟོན་པ་འོད་མའི་ཚལ་དུ་བཞུགས་པའི་ཚེ། བྱང་སེམས་སྒྲུབ་པ་རྣམ་སེལ་ལདུས་གསུམ་རྒྱལ་བའི་གདུལ་བྱར་མ་གྱུར་པ་འདྲེ་སྲིན་གདུག་པ་ཅན་ཅན་དུ་མས་གང་བའི་ཁ་བ་ཅན་གྱི་རྒྱལ་ཁམས་དེར། མ་འོངས་པ་ན་རྒྱལ་བའི་བསྟན་པ་རྒྱས་ཤིང་། མགོན་པོ་ནི་འཕགས་པ་སྤྱན་རས་གཟིགས་དབང་ཕྱུག་ཁོ་ན་ཡིན་ཞེས་ལུང་བསྟན་པ་བཞིནའཕགས་པ་སྤྱན་རས་གཟིགས་ཀྱིས་སྔོན་སངས་རྒྱས་དུ་མའི་སྤྱན་སྔར་གདུལ་བར་དཀའ་བའི་ཁ་བ་ཅན་གྱི་སེམས་ཅན་རྣམས་གང་ལ་གང་འདུལ་གྱི་མཐའ་ཡས་པས་སེམས་ཅན་དེ་ཀུན་སྨིན་ཅིང་གྲོལ་བར་བྱེད་ནུས་བ་དང་། སེམས་ཅན་དེ་རནམས་ཀྱང་དཀོན་མཆོག་ལ་སྐྱབས་སུ་འགྲོ་ཞིང་དམ་པའི་ཆོས་ལ་ཚུལ་བཞིན་དུ་སྤྱོད་པར་སྨོན་ལམ་བཏབ་པའི་མཐུ་ལས་བོད་ཀྱི་འགྲོ་བ་རྣམས་སྤྱན་རས་གིགས་ཀྱི་ཐུན་མོང་མ་ཡིན་པའི་གདུལ་བྱར་གྱུར་བ་ཡིན། འཕགས་པ་སྤྱན་རས་གཟིགས་ནི་ངེས་པའི་དོན་དུ་བསྐལ་པ་གྲངས་མེད་པའི་སྔོན་ནས་བདེ་བར་གཤེགས་པ་འོད་ཟེར་ཀུན་འཕགས་དཔལ་བརྩེགས་རྒྱལ་པོའི་ངོ་བོར་སངས་རྒྱས་ཟིན་ནའང་། འགྲོ་བ་རྣམས་གཞར་ཡང་མི་འདོར་བའི་བརྩེ་ཆེན་སྙིང་རྗེ་ཆེན་པོས་རང་བདེ་དོན་གཉེར་གྱི་ཞི་བའི་མཐའ་སྤངས་ཏེ་རིགས་དྲུག་གི་གནས་སུ་གང་ལ་གང་འདུལ་གྱི་སྤྲུལ་པའི་བཀོད་པ་མཐའ་ཡས་པར་སྟོན་པ་སོགས་ཐབས་མཁས་ཀྱི་མཛད་པ་སྣ་ཚོགས་པའི་སྒོ་ནས་ཡིད་བཞིན་གྱི་ནོར་བུ་ལྟར་འགྲོ་བའི་རྒུད་པ་མཐའ་དག་སེལ་ཞིང་། གནས་སྐབས་དང་མཐར་ཐུག་གི་ཕན་བདེ་མ་ལུས་པ་སྩོལ་བར་མཛད་པའི་བརྡར་ཕྱག་གཉིས་ཐལ་མོ་སྦྱར་བའི་བར་དུ་ནོར་བུ་འཛིན་པས་འཕགས་པ་སྤྱན་རས་གཟིགས་ལ་མཚན་དེ་ལྟར་ཐོགས་པ་ཡིན།

        ཇི་སྐད་དུ། དེ་ཡང་བྷང་ག་ལ་དང་ཨོ་རྒྱན་གྱི།

        ཡུལ་སོགས་འཕགས་ཡུལ་གསལ་བྱེད་སོ་དྲུག་དང་།།

        གངས་ཅན་ཆོས་བརྒྱད་བཅུ་དང་པཎ་གྲུབ་བདུན།།

        ངུར་སྨིག་འཆང་བ་རྣམས་ལ་གསོལ་བ་འདེབས།། ཞེས་གསུངས་བ་ལྟར། འཕགས་པ་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྣམ་སྤྲུལ། རྒྱ་གར་འཕགས་པའི་ཡུལ་དུ་བྲམ་ཟེའི་ཁྱེའུ་སྣང་བ་སོགས་བསྟན་འགྲོའི་གསལ་བྱེད་ཆེན་པོ་སོ་དྲུག་དང་། བྱེ་བྲག་བོད་གངས་ཅན་གྱི་ལྗོངས་སུ། ཐོག་མར་སྣོད་བཅུད་བྱིན་གྱིས་རློབ་པའི་ཕྱིར་མཚོ་བྲི་བ་དང་བར་དུ་བྱང་ཆུབ་སེམས་དཔའ་སྤྲེའུའི་རྣམ་པས་མིའི་འགྲོ་བ་སྤེལ་བ། མཐའ་མར་གང་ལ་གང་འདུལ་གྱི་སྤྲུལ་སྒྱུར་སྣ་ཚོགས་པས་གངས་ཅན་སྐྱེ་འགྲོ་མ་ལུས་སྨིན་གྲོལ་གྱི་ལམ་བཟང་པོར་བཀོད་དང་འགོད་པར་མཛད་པའི་སླད་དུ། བོད་རྗེ་ཐོག་མ་གཉའ་ཁྲི་བཙན་པོ་ལ་སོགས་ཆོས་རྒྱལ་བཅུ་དང་། འབྲོམ་སྟོན་ཆོས་ཀྱི་རྒྱལ་པོ་ལ་སོགས་པའི་པཎ་གྲུབ་བདུན། ཕྱག་ན་པདྨོ་༧རྒྱལ་མཆོག་དགེ་འདུན་གྲུབ་པ་ནས་བཟུང་སྡོམ་བརྩོན་ངུར་སྨིག་འཆང་བའི་སྐུའི་ཕྲེང་བ་རིམ་པར་བྱོན་པ་རྣམས་ཀྱིས་བོད་གངས་ཅན་གྱི་ལྗོངས་སུ་ཆོས་སྲིད་ལུགས་གཉིས་ཀྱི་སྣང་བས་ཁྱབ་པར་མཛད་དེ་བདེ་བར་བསྐྱངས།།

ཡི་གེ་དྲུག་མའི་དོན།

        ཨོཾ་མ་ཎི་པདྨེ་ཧཱུྃ། ཞེས་པའི་ཡི་གེ་དྲུག་མ་འདི་ནི། རྒྱལ་ཀུན་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་ཀྱི་མཚན་སྔགས་ཡིན། ཆོས་ཀྱི་སྙིང་བོ་མ་ཎི་ཡི་གེ་དྲུག་མ་འདི་ཉིད་ཆོས་ཕུང་བརྒྱད་ཁྲི་བཞི་སྟོང་གི་སྙིང་བོ་གཅིག་ཏུ་བསྡུས་པ། བདེ་བར་གཤེགས་པ་རིགས་ལྔ་དང་། གསང་སྔགས་རྒྱུད་སྡེ་ཀུན་གྱི་ཡང་སྙིང་། ཡོན་ཏན་ཐམས་ཅད་ཀྱི་འབྱུང་གནས་དང་དངོས་གྲུབ་ཀྱི་རྩ་བ་ཡིན་ཞིང་། དེ་ཡང་། ཨོཾ་ནི་སྔགས་ཀྱི་མགོ་འདྲེན། མ་ཎི་ནི་མེ་ཏོག་པདྨ། ཧཱུྃ་ནི་ཐུགས་རྡོ་རྗེའི་ས་བོན་ཏེ། བདག་རྗེས་སུ་ཟུངས་ཤིག་ཅེས་སྐུལ་བར་བྱེད་པའི་ཚིག་ཡིན། དོན་དུ་ནོར་བུ་པདྨའམ་པདྨ་ནོར་བུ་འཛིན་པས་བདག་སྐྱོབས་ཞེས་ཟེར་བ་ཡིན། དེ་ཡང་འཕགས་པ་སྤྱན་རས་གཟིགས་ཀྱི་ཕྱག་གཡས་པ་ལ་ནོར་བུ་པདྨ་དང་། གཡོན་པ་ལ་པདྨ་བསྣམས་ཡོད་པས་ནོར་བུ་པདྨ་འཛིན་པ་ཞེས་ཞུ་བ་ཡིན། གང་ལྟར་ཀྱེེ་ནོར་བུ་པདྨ་བསྣམས་པའི་སྤྱན་རས་གཟིགས། བདག་སོགས་སེམས་ཅན་ཐམས་ཅད་ཀྱི་རྒྱུད་ལ་བྱམས་སྙིང་རྗེ་དང་བྱང་ཆུབ་ཀྱི་སེམས་རིན་པོ་ཆེ་སྐྱེ་བར་བྱིན་གྱིས་བརླབ་ཏུ་གསོལ་ཞེས་སྐུལ་བ་ཡིན།།

        ཡི་གེ་དྲུག་མའི་ཕན་ཡོན།

        གཟུངས་སྔགས་ཡི་གེ་དྲུག་མ་ཚུལ་བཞིན་དུ་འདོན་ན་ཕན་ཡོན་ཚད་མེད་པ་མ་ཎི་བཀའ་འབུམ་སོགས་སུ་གསུངས། མདོར་བསྡུས་པ་ཆོས་རྒྱལ་སྲོང་བཙན་སྒམ་པོས་གསུངས་བ་ནི་གཤམ་གསལ་ལྟར་ཡིན། 

        དེ་ཡང་ཆོས་སྐྱོང་བའི་སྲོང་བཙན་སྒམ་པོས་ཡི་གེ་དྲུག་མའི་རིག་སྔགས་འདི་བཟླ་ན་ཕ་རོལ་ཏུ་ཕྱིན་པ་དྲུག་གི་ཆོས་རྣམས་རྫོགས་པར་འགྱུར་ཏེ། 

        ༡ ཨོཾ་གྱིས་སྦྱིན་པའི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་འགྱུར་རོ།།

        ༢ མས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་འགྱུར་རོ།།

        ༣ ཎིས་བཟོད་པའི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་འགྱུར་རོ།།

        ༤པད་ཀྱིས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་འགྱུར་རོ།།

        ༥མེས་བསམ་གཏན་གྱི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་འགྱུར་རོ།། 

        ༦ ཧཱུྃ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་འགྱུར་རོ།། 

        ཡི་གེ་དྲུག་པའི་རིག་སྔགས་འདི་བཟླས་པས་དངོས་གྲུབ་འཐོབ་པར་འགྱུར་རོ།། 

        ༡ ཨོཾ་གྱིས་མཆོག་གི་དངོས་གྲུབ།

        ༢མས་ཐུན་མོང་གི་དངོས་གྲུབ།

        ༣ཎིས་ནད་གདོན་ཞི་བའི་དངོས་གྲུབ།

        ༤པད་ཀྱིས་ཚེ་དང་བསོད་ནམས་རྒྱས་པའི་དངོས་གྲུབ།

        ༥མེས་མི་ནོར་ཟས་གསུམ་དབང་དུ་འདུ་བའི་དངོས་གྲུབ།

        ༦ཧཱུྃ་གྱིས་དགྲ་བགེགས་གནོད་བྱེད་ཚར་གཅོད་པའི་དངོས་གྲུབ་འཐོབ་པར་འགྱུར་རོ།།

        ཡི་གེ་དྲུག་པོ་འདི་བཟླས་པས་རྩ་བའི་ཉོན་མོངས་དྲུག་དག་པར་འགྱུར་རོ།།

        ༡ཨོཾ་གྱིས་ཉོན་མོངས་བ་གཏི་མུག

        ༢མས་ཞེ་སྡང་།

        ༣ཎིས་སེར་སྣ།

        ༤པད་ཀྱིས་འདོད་ཆགས།

        ༥མེས་ཕྲག་དོག

        ༦ཧཱུྃ་གྱིས་ང་རྒྱལ་གྱི་སྒྲུབ་པ་དག་པར་འགྱུར་རོ།།

        ཡོན་ཏན་དྲུག་འཐོབ་པ་ནི།།

        ༡ཨོཾ་གྱིས་སྤྱན་རས་གཟིགས་ཀྱི་སྐུ།

        ༢མས་སྤྱན་རས་གཟིགས་ཀྱི་གསུང་།

        ༣ཎིས་སྤྱན་རས་གཟིགས་ཀྱི་ཐུགས།

        ༤པད་ཀྱིས་སྤྱན་རས་གཟིགས་ཀྱི་ཡོན་ཏན།

        ༥མེས་སྤྱན་རས་གཟིགས་ཀྱི་འཕྲིན་ལས།

        ༦ ཧཱུྃ་གྱིས་སྤྱན་རས་གཟིགས་ཀྱི་མཛད་པ་འཐོབ་པར་འགྱུར་རོ།།

        དེ་བཞིན་དུ།

        ༡ཨོཾ་གྱིས་ཚོགས་ལམ་གྱི་ཡོན་ཏན།

        ༢མས་སྦྱོར་ལམ་གྱི་ཡོན་ཏན།

        ༣ཎིས་མཐོང་ལམ་གྱི་ཡོན་ཏན།

        ༤པད་ཀྱིས་སྒོམ་ལམ་གྱིས་ཡོན་ཏན།

        ༥མེས་མི་སློབ་ལམ་གྱི་ཡོན་ཏན།

        ༦ ཧཱུྃ་གྱིས་རྣམ་པ་ཐམས་ཅད་མཁྱེན་པའི་ཡོན་ཏན་འཐོབ་པར་འགྱུར་རོ།།

རྩོམ་སྒྲིག་པ།:卓玛央初
གཙོ་སྒྲུབ། ཀྲུང་གུང་སེམས་ཀྱི་ཉི་ཟླ་རྫོང་ཨུ། སེམས་ཀྱི་ཉི་ཟླ་རྫོང་མི་དམངས་སྲིད་གཞུང་།
འགན་སྒྲུབ། སེམས་ཀྱི་ཉི་ཟླ་རྫོང་ཨུའི་ཆ་འཕྲིན་ལག་རྩལ་དོ་དམ་ལྟེ་གནས། སེམས་ཀྱི་ཉི་ཟླ་གློག་རྡུལ་སྲིད་དོན་དོ་དམ་ལྟེ་གནས། 0887-8222726
གྲ་སྒྲིག་ཡིག་ཆའི་ཨང་རྟགས། ཡུན་ནནICP ཨང་རྟགས། 13000589
ལག་རྩལ་རྒྱབ་སྐྱོར། ཡུན་ནན་དྲ་བ།